म्युजिक भिडियोमा अब्बल थिए आलोक नेम्वाङ

डब्बु क्षत्री/काठमाडौं
म्युजिक भिडियो भन्नासाथ गायकगायिकाले निर्देशनका लागि आलोक नेम्वाङलाई सम्झिन्थे । हुन पनि उनको काम गर्ने शैली नै फरक थियो । सस्तो महँगोभन्दा पनि राम्रो भिडियो बनाउनुपर्छ भन्ने उनको मान्यता थियो ।

यही मान्यतालाई आत्मसात् गरेर अगाडि बढेका निर्देशक नेम्वाङले ७ सयभन्दा बढी म्युजिक भिडियोको निर्देशन गरिसकेका थिए । चार महिनाअघि चलचित्र अझै पनिको छायांकन सकेपछि उनले राजधानीसँग भनेका थिए, ‘चलचित्रको काममा व्यस्त भएकाले धेरै म्युजिक भिडियो त बनाउँदिनँ तैपनि महिनामा दुईटासम्म म्युजिक भिडियो निर्देशनलाई निरन्तरता दिन्छु ।’

उनको म्युजिक भिडियो निर्देशन यात्रा पनि रोचक किसिमले सुरु भएको थियो । ५ सयभन्दा बढी म्युजिक भिडियो खिचिसकेका विदूर पाण्डेले नेम्वाङसँगको काम सम्झिँदै गर्दै भने, ‘०५२ साल तिर विजय लामा दाइले इमेज च्यानलमा आलोक नेम्वाङलाई लिएर आउनु भएको थियो । अमेरिकाबाट पढेर आएकाले उनले थुप्रै नयाँ अवधारणा ल्याए ।’ म्युजिक भिडियो यात्राबारे पाण्डेले भने, ‘भूषण दाहाल दाइले म्युजिक भिडियो बनाएको देखेर आलोकले म पनि म्युजिक भिडियो बनाउँछु भनेर मसँग प्रस्ताव ल्याए ।

नवीन के भट्टराईको लाखौं पटक...बोलको सो गीतको स्टोरी बोर्डसमेत आलोकले बनाएर ल्याएकाले शाह न शाह होटलमा मैले पाँच घन्टामै सो भिडियाको सुटिङ सकेको थिएँ ।’

मिश्रिलाल यादव र प्रकाश तुलाधरले निर्देशन गरेको सो भिडियोमा झरना थापासँग आलोक आफैंले अभिनय गरेका थिए । त्यो भिडियो राम्रो र सफल बनेपछि आफूहरू निकै खुसी भएको बताउँदै छायाँकार पाण्डेले भने, ‘दोस्रो भिडियोका रूपमा राजन इशानको वशमा छैन यो मन... आलोक र मैले ग¥यौं । त्यो पनि सफल भएपछि आलोकले म्युजिक भिडियो निर्देशनका लागि कहिल्यै खाली बस्नुपरेन ।’

अहिलेसम्म आफूले काम गरेका म्युजिक भिडियो निर्देशकमध्ये सबैभन्दा बढी काम गर्न सजिलो आलोक नेम्वाङसँग भएको स्मरण गर्दै छायाकार पाण्डेले भने, ‘म्युजिक भिडियोका सबै दृश्यको स्टोरी बोर्ड उनले बनाएर दिने हुँदा छायांकन गर्न म कहिल्यै दोधारमा परिनँ । उनले निर्देशन गरेको म्युजिक भिडियो आँखालाई बिझाउने प्रकारको हुँदैन थ्यो ।’ विदुरले अझ स्मरण गर्दै अगाडि भने, ‘कुनै कुनै म्युजिक भिडियोको छायांकन गर्न मैले र सम्पादन गर्न प्रकाशले नभ्याए पनि आलोकले अरूबाट गराउँथे तर उनले बीएपी कम्पनीबाहेक अरूबाट काम गरेनन् र यो कम्पनीमा हामीलाई सधँै बाँधेर उनी अघि बढिरहेका थिए ।’

विदुर पाण्डे, आलोक नेम्वाङ र प्रकाश तुलाधर यी तीनले बीएपी (बाप) पोडक्सन नै सुरु गरे । विगत १२ वर्षदेखि सोही कम्पनीबाट आलोकले म्युजिक भिडियो बनाए । ईमेज च्यानल छाडेपछि उनीहरूले यो कम्पनी खोलेका थिए । कान्तिपुर टिभीदेखि च्यालन नेपाल र त्यसपछि स्वतन्त्र हुँदा पनि आलोकले यही कम्पनीमार्फत् नै काम गरे । उनको म्युजिक भिडियोको प्रशंसा भूषण दाहाल पनि प्रायः गरिरहन्थे । नृत्यमा सौखिन आलोक नेम्वाङले प्रवेश बान्तवालगायतसँग नृत्य निर्देशन सिकेर त्यो सीपले म्युजिक भिडियोलाई निरन्तर सजाए ।

आलोकले करिब ७ सयओटा म्युजिक भिडियोको निर्देशन गरिसकेका प्रकाश तुलाधरले भने, ‘उनको पहिलोदेखि अन्तिम भिडियोसम्म मैले निर्देशन गरेँ । सधँै हाँसिरहने मान्छे यसरी हामीलाई रुवाएर जान्छजस्तो लागेको थिएन ।’

आलोकले स्टोरी बोर्ड साथमा ल्याउने र दृश्यको व्याकरणलाई पालना गरेर सम्पादन गर्न लगाउने भएकाले उनीसँग काम गर्न आफूलाई कहिल्यै गाह्रो नभएको प्रकाश पारे । आलोकको म्युजिक भिडियो सरल तर सुन्दर र रङ संयोजन मिलेको हुने गरेको पनि तुलाधरले प्रकाश पारे । आलोकले पछिल्लो समय निर्देशन गरेको अझै आठओटा म्युजिक भिडियो प्रकाशले सम्पादन गरिरहेका छन्,

‘आलोकप्रति श्रद्धाञ्जली व्यक्त गर्दै यी आठ म्युजिक भिडियो म चाँडै तयार गरेर टेलिभिजन च्यानलबाट रिलिज गर्छु ।’ बीएपी प्रोडक्सनका ‘ए’ अर्थात् आलोकलाई गुमाउँदा बाँकी दुई साथी विदुर र प्रकाश यतिबेला साह्रै मर्माहत भएका छन् । त्यही पनि आलोकको सम्झनालाई ताजै राख्न बीएपी प्रोडक्सनबाट केही न केही गर्ने चाहना यी दुईको छ ।

आलोकसँग म्युजिक भिडियोमा मोडलिङ गरेका मोडलहरू जहिल्यै पनि काम गर्न तयार हुन्थे । नेपाली चलचित्र र म्युजिक भिडियो वृत्तमा धेरै प्रतिभा जन्माएका यी निर्देशकले नेपाली म्युजिक भिडियोलाई यहाँसम्म ल्याइपु¥याउन निकै योगदान दिए । 

निर्देशक नेम्वाङको अन्तिम संस्कार

बिहीबार आफ्नै निवासमा मृत भेटिएका चलचित्र निर्देशक आलोक नेम्वाङले आत्महत्या गरेको पुष्टि भएको छ । उनको शुक्रबार अपराह्न पशुपति आर्यघाटमा दाहसंस्कार गरियो । शुक्रबार बिहान राजधानीको महाराजगन्जस्थित त्रिविवि शिक्षण अस्पतालमा उनको ‘पोस्टमार्टम’ गरिएको थियो । पोस्टमार्टमबाट आत्महत्या गरेको पुष्टि भएको प्रहरीले जनाएको छ ।
प्रहरीले घटनास्थलबाट ‘आत्महत्यापत्र’ बरामद गरे पनि सो पत्र सार्वजनिक गरिएको छैन । बारम्बर मर्नुभन्दा एकै पटक मर्नु आनन्द भन्दै आत्महत्या गरेको सो पत्रमा उल्लेख गरिएको प्रहरी सूत्रले जनाएको छ । आफूले पालेका कुकुर बिरालोलाई पनि मारेर आफूसँगै गाडिदिन उनले आफ्ना सहकर्मी मोडलहरूसँग भनेका थिए तर त्यो कुरा मोडलहरूले पत्याएका थिएनन् ।

पोस्टमार्टमपछि उनको पार्थिव शरीरलाई शुक्रबार मध्याह्नपछि तीन घन्टासम्म कमलादीस्थित नेपाल प्रज्ञा प्रतिष्ठानको डबलीमा राखिएको थियो । संविधानसभाका अध्यक्ष सुवासचन्द्र नेम्वाङ, सूचना तथा सञ्चारमन्त्री डा. मीनेन्द्र रिजाल, विभिन्न चलचित्रकर्मी, मोडल तथा शुभचिन्तकले उनको पार्थिव शरीरमा श्रद्धाका फूल चढाए । नेम्वाङ लामो समयदेखि एक्लै बस्दै आएका थिए । परिवारमा उनका ७० वर्षीया आमा र दिदी छन् । आमा भने छोरी र ज्वाइँ (अभिनेता एवं हवाई चालक विजय लामा) सँग बस्दै आएकी छन् ।

करिब ८ सयओटा म्युजिक भिडियो निर्देशन गरेका नेम्वाङले चलचित्र सानो संसारबाट सिनेमा निर्देशनमा हात हालेका थिए । यसपछि उनको निर्देशनमा चलचित्र कोही मेरो रिलिज भयो भने उनले निर्देशन गरेको अर्को चलचित्र फागुनमा रिलिज गरिने भएको छ ।